قال الرئيس عبدالفتاح السيسي، إن مصر لن تسمح بدخول أىة بضائع غير متوافقة مع المعايير الأوروبية بدءًامن مارس 2022.
وأضاف السيسي خلال تفقد عمليات تطوير ميناء الإسكندرية البحري: “بقول الكلام ده علشان الشركات المعنية تساعد الدولة والحكومة في الإجراءات اللى بنعملها وهى هدفها تسهيل الأعمال وقدر ضخم من الشفافية”.
تابع: ” نتكلم كدولة زى ما الدول المتقدمة في التجارة بتعمل..، احنا شغالين بحاجة اسمها المعايير الأوروبية.. علشان كده لن نسمح بدخول أى بضائع إلا طبقا للمعايير الأوروبية”.
واستكمل: “مش هنقبل إن حاجة تخش.. أي حد يستورد أى حاجة يبيعها للناس تشتغل أسبوع أو شهر وتترمى لا.. احنا هندخل كل البضائع اللى هتخش البلد طبقا للمعايير زى الدول المحترمة مابتشتغل”.
وأضاف: “هنستورد حاجتنا من شركات محترمة علشان الناس اللى في مصر تشترى وهى مطمنة ومش هنسمح لأى مستورد أنه يجيب أى حاجة غير متوافقة”.
وتابع: “الكام شهر اللى فات كان عبارة عن إجراءات اختبارية، لكن من أكتوبر هنبدأ التجهيز للتطبيق، وبدءًا من مارس 2022 سيتم تطبيق المعايير اللى اتفقنا عليها، لكل البضائع اللى تخش مصر طبقا للمعايير الأوروبية”.
وقال: “أدينا فرصة للمستوردين لما يتعاقدوا على بضائع ومواد هيطبق عليها المعايير اللى بتكلم عليها، ولو مش هانبقى جاهزين في مارس 2022 قولولي”.
السيسي: مواجهة الفساد بـ”الميكنة”
وأشار الرئيس السيسي إلى أن مواجهة الفساد تتطلب تعظيم الاعتماد على الميكنة مثلما يحدث في كل دول العالم.
وقال: “خلوا بالكم دولة زى مصر فيها 100 مليون نسمة.. حجم العمل فى مصر لو مميكن ميكنة كاملة كتير من الحاجات اللى بتعانوا منها وبتشوفوها مش هاتبقى موجودة، لو فيه فساد عاوزين تواجهوه بجد مش هيتواجه غير بكده إن البشر ميتعاملش غير مع مكن سواء كان المواطن أو الموظف ومفيش اتصال مباشر مع الموضوع.. النظام ده موجود فى العالم مندخلوش عندنا ليه؟”.
وأضاف: “أديله الموافقة على الشحنة قبل ما تيجى على الميناء، والبضاعة قبل ما تتشحن من البلد المصدر ومش هديله موافقة ومش هتنزل الميناء وده هايبقى إجراء قد تجدوه صعب لكن بنعمل إجراءات الدنيا كلها بتعملها احنا مش هانبقا عجبة، احنا بنعمل اللى غيرنا سبقنا فيه، وبنحاول نحصله علشان نسهل على الناس ونضمن إن الحاجات اللى بتخش بلدنا طبقا للمعايير ، ولو فيه حاجة فيها مخاطر زى المخدرات ، وكل ما هنسيطر على حركة دخول المنافذ بشكل كامل هنقدر نحقق ونشوف زى ما الدول المتقدمة بتعمل.
